كل واحد فينا بيتمنى حاجات كتير
بيحاول انه يحقق كله بس مابيعرفش لان مافيش انسان بيحقق كل حاجه ولا بياخل كل حاجه
يحدد اهم حاجه عنده واول مايوصلها تلاقيه عايز غيرها ويحقق غيرها عايز غيرها وهكذا
ده طموح ومش غلط ان الواحد يكون عنده طموح وهدف بيسعى وراه لحد مايحققه
لان الانسان من غير هدف يبقى بلا حياة
وطول ما احنا بنجرى ورا اهدافنا بنقابل حاجات كتير ومواقف اكتر بنتعلم منها
والى لقيته ان معظمنا مابيكونش راضى رضا تام باى حال بيكون فيه واى حال بيوصله واى حاجه بتحصل
الواحد من صغره يقعد يحلم يكبر ويدخل الكليه الفلانيه ويدخل ثانوى يقعد يحارب فى المذاكره
فى الاخر لو دخل الكليه الى عايزه يقعد يشتم ويدعى عليها ويكون كارها على الرغم انه هو الى عايزها
بيكون زيه زى الى دخل كليه مش عايزها
الخطوه الى بعديها يقعد يخطط عايز يشتغل ايه وحياته تكون عامله ازاى
يشتغل الشغلانه الى عايزها اما يطلع العبر فى الشغل او العبر فى مديره اهو يطلع العبر فااى حاجه وخلاص
المهم انه بيكون فى الاخر مش راضى رضى تام عن الى هو فيه ويتمنى حاجه غير الى هو فيها
حتى لما بيجى يحب بيحب الى مش بيحبه
ويسيب الى بيحبه
ولو حب حد والى حبه بادله نفس الشعور بتلاقى فى الاخر مشاكل وكل واحد يقعد يقول مكنتش متوقع انه كده
كل الكلام الى فوق كده بيحصل مع معظمنا فى ممكن حد وهو بيقرأه هيقول لا مش بيحصل معايا
بس لو فكره هيلاقى الكلام ده بيحصل معاه
جزء منه او كله
بس المهم انه بيحصل
ياريت نحاول نرضى للى نوصله والى ربنا يكتبهولنا بس فى نفس الوقت طموحنا يكون كبير