بما ان البلوج ده بيت فكرى وقلمى والمكان الى اقدر اكتب فيه وافضفض فيه براحتى من غير ما حد يقولى لا
انا حبيت اتكلم عن دماغى واعماق نفسى بس ده مش من باب الفخر علشان محدش يظن ظن خاطىء
انما حسيت انى عايزه اطلع دايره تفكيرى والى موجود جوايا على ورقوطبعا علشان احنا فعصر التكنولوبيا:D
فبما انى بنيت بيت لافكارى وقلمى يبقى هو المكان الوحيد الى ينفع اكتب فيه حاجه زى كده
حاسه ان دماغى فيها خيوط افكار كتير ومترابطه جدا مش عارفه ليه ودايما بحس انها شغاله حتى وانا نايمه بحس انها شغاله مابحسش ان دماغى نامت وارتاحت الا قليل جدا
معرفش عندى احساس فظيع انى فيا حاجه مميزه بالنسبه لتفكيرى برضو ايه هى لسه محددتهاش
وناس حوليا واصلهم نفس الاحساس يمكن علشان انا حاسه بده فواصلهم نفس الاحساس
شايفه ان كلواحد يقدر يكون فيلسوف لان كل انسان ليه فكر خاص بيه ف الحياه
لقيت ناس تجيب اقوال فكتابتها وتقول اقوال مأثوره عن فلان فقولت فلان وعلان دول ماهم كانو ناس زينا زيهم
مافيش حاجه مختلفه بينا وبينهم كل الى كانوا بيعملوه انهم بيترجموا فلسفتهم ونظرتهم للحياه الى اقوال
وعملت كده فعلا وعملت اقوال خاصه بيا وناس كتير اخدتها بس طبعا من غير اسمى ونشرتها فمواقع
المهم انى فرحت ان اثبت ان الاقوال دى ممكن اى حد يكتبها لانها ترجمه لنظرته هو للحياه والناس
حاسه ان نفس البنى ادم دى عمييييييييييقه لدرجه كبيره جدا
اكنها اوض او صناديق فقلب بعضها وضلمه بيبدا الواحد يفتح فواحده ينورها ويفهم الى فيها
يبدا يفتح فى الصناديق دى والكلام ده مدى الحياه الصناديق دى مش بتخلص
مش عارفه وجهه نظرى وفكرى ده ممكن يتفق مع حدوالتانى لا المهم انى مقتنعه بيه