السيد الرئيس /محمد حسنى مبارك

بعد التحيه ,.......

فى البداية أود أن أوضح لسيادتكم ان هذا الخطاب ليس خطاب رسمى ولكنه خطاب أبوى بين أب وأحد ابنائه الصغار.

والدى العزيز وحشتنى جدا ومصر كمان وحشانى اوووى , اكيد احنا كمان وحشناك

بقالك كتير مازرتناش , ماوحشتكتش ترحيب اهالى المحروسه لك؟ ولا كوبايه الشاى فى بيت اى مواطن مصرى بسيط؟

وحشتنى ومصر كمان على الرغم انى عايشه فيها بس وحشتنى مصر بتاعه زمان المليانه بالخير مافيش حد فيها يموت من الجوع

دلوقتى بقيناا نموت من العطش مش الجوع بس على الرغم ان النيل قريب مننا عل بعد أمتار

والدى ليا امنيه ياريت تحققهالى وتحققها لكل ولادك فمصر نفسى تفتح ستارة عربيته وانت فى طريقك القى مجرد نظره على وجوهنا

هتلاقى ملامحنا اتغيرت طباعنا اسلوبنا سلوكنا كل حاجه فينا اتغيرت بس للاسف للاسوء

هتلاقى مكتوب على وجوهنا بدل تسامح هم وحزن وفقر وظلم ومستقبل بلا هاويه

نفسى تزور شارع من شوارعنا البسيطه فاى منطقه من المناطق البسيطه , تسمعنا تسمع مشاكلنا

بيوصلك كلام ان الشعب مبسوط وفرحان بس احنا فى شده الاسى والحزن بننقب كل يوم عن اى شىء يبث السعاده فى نفوسنا حتى ولو كان بسيط

نفسى ولو يوم واحد تخاف علينا زى اولادك واحفادك فعلا مش لازم زيهم بالظبط تخاف علينا ربع خوفك عليهم

نفسى تشوف حال ولادك فى المدارس بدل ما تبقى مدارس بقى خرابات

والمستشفيات اتحولت لمراكز سرقه الاعضاء واماكن لقتل الناس بصوره مباشره او غير ذالك

والمصالح الحكوميه وهى لا تصلح للاستخدام الاّدمى

نفسى تحس بكل حاله ظلم نمر بها بكل صرخه مظلوم

نفسنا مصر ترجع زى زمان بنحبها بس مش هنفضل مستحملين عذابها كتير

نفسنا نحس بنفسنا بكرامتنا نحس اننا عايشين

والدى كل يوم بيمر علينا بيقتل فينا حاجات كتير خايفين لايجى يوم ونجد نفسنا فى قبور الحياه

فى النهايه بحبك يا بابا وبحب مصر ونفسى هى كمان تحبنى وتتمسك بيا اكتر من كده